النهارده الصبح قايم
نُصى لسه مكانه نايم
نُصى خدنى للحياه
قصدى حاجه مقومانى
بفرشتى غسلت سنانى
وف هدومى معبيانى
بس انا ما بقولش لا

النهارده مش عشانى
النهارده جه .. ما جاش
سمعت ناس بيقولوا مات
وسمعت ناس بيقولوا عاش
دى غنوه دى .. دا فيلم ده
دى وحشه دى .. دا حلو ده
دى حقيقه دى .. دا حلم ده
واللا كابوس
نفس البشر
دايرين على نفس التروس
النهارده الصبح نمت
النهارده الصبح قمت
ما افتكرش فطرت ولاّ
قمت بس شربت شاى

الزمان ده إشارته حمرا
الشارع ده ليه طويل ؟؟
زحمه دخان دوشه توهه
ومستحيل مستحيل

بلوزه كَت وجُوْب قصيّر
ست ماسكه ولد صُغّيّر
هيه صبح واللا ليل؟؟
هيه برد والا صيف ؟؟
كل غنوه وليها لحن
كل قطر وله رصيف
يالطيف

سلوى حلوه مروه أحلا
إتخنقت من البنات
إس إم إس واللا شات
مِزْد كوول واللا كوول
كله كوووول
ضحك لعب جد حب
فى الكليْب
عبدالحليم بيحب شاديه
وتوم كروز بيسيب نيكول
زغروده عاليه.. صقفه.. طبله
شاب جاب للبنت دِبْله
شاب جاب للبنت ورده
كل ليله فى المعادّه
خناقه جامده
أدان بيدْن
الحد قبل السبت جايز
العشره قبل التسعه يمكن
بس ممكن
يبقى بكره زى بَعدُه
وزى بَعضُه
الحياه مابقيتش فارقه
قلبى فاضى
جيبى فاضى
سريرى فاضى
عقلى مليان بالخناق
ليه قميصى مش مقاسى
وبنطلونى الجينز ضاق
الحياه دخانها طالع
بس مين يقرالها طالع
من زمان ما بنامش ليه
أكيد عشان الحلم جارح
عمرى ليه ما سألت نفسى
لفين انا فى الدنيا رايح
أصل انا ما اعرفش اصلا
بابقى رايح واللا جاى

بين قوسين

جوّه منى شئ كويس
بس مالوش مكان

انا مش بخرّف
مش باهيّس
انا تعبان
تعبان
تعبااااااااااااااااااااااااااااان